მედია

09 დეკემბერი 2021

ხელის ბლენდერი თუ მულტიფუნქციური?

ბლენდერის ყიდვა თუ გადაწყვიტეთ, უმჯობესია, თავიდანვე გქონდეთ ინფორმაცია მათი კონსტრუქციების თავისებურებებისა და ექსპლუატაციის სპეციფიკის შესახებ, რათა დავალებაც კარგად შეგისრულოთ და ზედმეტიც არ გადაიხადოთ იმ ფუნქციებისთვის, რომლებიც შეიძლება, არც კი გჭირდებათ.

განვიხილოთ თითოეული ცალ-ცალკე:

სტაციონარული მულტიფუნქციური ბლენდერი

სტაციონარული მოდელისთვის, მისი დიდი გაბარიტების გამო, სამზარეულოში ადგილის გამოყოფა მოგიხდებათ. მოწყობილობის ქვედა ნაწილი მისი ბაზაა, სადაც ძრავაა განთავსებული, ხოლო ზედა ნაწილი ჭიქაა, რომელშიც პროდუქტი უნდა ჩაყაროთ. სტაციონარული ბლენდერის ჭიქის მოცულობა შეიძლება იყოს 500 მლ-დან 2 ლ-მდე, ოპტიმალურ მოცულობას კი თქვენი საჭიროების მიხედვით შეარჩევთ. ამგვარი მოწყობილობის ასამუშავებლად და პროდუქტის დასაბლენდერებლად თქვენ, მხოლოდ, ღილაკზე თითის ერთი დაჭერა დაგჭირდებათ, დანარჩენ საქმეს აპარატი დამოუკიდებლად გააკეთებს.

აპარატის მთავარი უპირატესობა დიდი სამუშაო სიმძლავრეა. თანამედროვე სტაციონარული ბლენდერების ზოგიერთი მოდელი, უკვე, სრულად ჩაგინაცვლებთ სამზარეულოს კომბაინს და საშუალებას მოგცემთ, ერთდროულად, საკმაოდ, დიდი რაოდენობის პროდუქტი დაამუშაოთ. სტაციონარული მოდელი, საჭიროების შემთხვევაში, შეგიძლიათ, გამოიყენოთ როგორც ხორცსაკეპი მანქანა ან მიქსერი. მოსახერხებელი და, თანაც, მულტიფუნქციური ბლენდერი, განსაკუთრებით, აქტუალურია დიდი ოჯახებისთვის.
ხელის მულტიფუნქციური ბლენდერი


ხელის ბლენდერი

ხელის ბლენდერი, როგორც დასახელებაშივე ჩანს, ხელით მართვას მოითხოვს. მუშაობის პროცესში აპარატის კორპუსი ხელით უნდა გეჭიროთ და თითით უნდა აწვებოდეთ ჩართვის ღილაკს, სანამ დანები დასამუშავებელი პროდუქტის მასაში ტრიალებს.

ამგვარი მოწყობილობის ძირითადი პლუსები კომპაქტური ზომა, მსუბუქი წონა და ხელმისაწვდომი ფასია.


პორტატიული , ანუ, მინი ბლენდერი

ბოლო დროს პოპულარული გახდა ბლენდერების კიდევ ერთი სახეობა - მინი ბლენდერი, იგივე პორტატული ბლენდერი. ეს სტაციონარული ბლენდერის ერთგვარი მინი ვერსიაა, რომელიც შეგიძლიათ,  სულ თან ატაროთ და, თქვენი სურვილისამებრ, ნებისმიერ ადგილას გამოიყენოთ: სამსახურში, სპორტდარბაზში, მანქანაში, მატარებელში... ასეთი მოდელები, როგორც წესი, მუშაობს აკუმულატორით და დასატენად მოჰყვება USB კაბელი. გემრიელი და სასარგებლო სასმელის - მაგალითად, ხილის სმუზის მოსამზადებლად შეგიძლიათ, სახლიდან გასვლის წინ აპარატის ჭიქაში წინასწარ ჩაყაროთ დაჭრილი ხილი თუ ბოსტნეული და თან წაიღოთ, შემდეგ კი, უშუალოდ, მოხმარების წინ დააბლენდეროთ, რაზეც ნახევარი წუთი თუ დაგეხარჯებათ.


რისი მომზადება შეგვიძლია?

ბლენდერის ფუნქციებს კონსტრუქციების თავისებურებები განაპირობებს.

ასე, მაგალითად:

  • ხელის ბლენდერით შეიძლება, სულ, რამდენიმე წუთში მოამზადოთ მუსი, ბოსტნეულის კრემ-წვნიანი, კრემი ნამცხვრისთვის და თხელი ცომიც კი. მეტიც - მომზადების პროცესში, პირდაპირ, ქვაბშიც შეგიძლიათ კერძის დაბლენდერება;
  • სტაციონარული მულტიფუნქციური ბლენდერი იდეალურად უმკლავდება, მაგალითად, ყინულის დამტვრევას, ყველანაირი ბოსტნეულის, ხილის, ხორცის დამუშავებას, ბლანტი მასის მომზადებას და გაყინული პროდუქტების დაქუცმაცებასაც კი;
  • მინი ბლენდერი კი საუკეთესო აპარატია სმუზის და პროტეინების კოქტეილების მოსამზადებლად.
მულტიფუნქციური ბლენდერი


რამდენი უნდა იყოს ბლენდერის ოპტიმალური სიმძლავრე?

სიმძლავრე უნდა შეარჩიოთ იმის გათვალისწინებით, თუ რისთვის გამოიყენებთ ამ მოწყობილობას. მაგალითად:

  • დარბილებული ხილისა და ბოსტნეულისთვის, ცივი ყავისთვის, სმუზის და კოქტეილების მოსამზადებლად საკმარისია პატარა აპარატი, რომლის სიმძლავრეა 250-500 ვტ.
  • თხილეულისთვის, უმი ხილ-ბოსტნეულისთვის უმჯობესია, შეარჩიოთ ისეთი მოდელი, რომლის სიმძლავრეა 600-800 ვტ;
  • გაყინული ხილისა და ბოსტნეულისთვის, ხორცისთვის, ყინულის სამტვრევად გამოგადგებათ ბლენდერები, რომელთა სიმძლავრეა 1000 ვტ და მეტი.

სიმძლავრის შერჩევისას უნდა გაითვალისწინოთ, რომ რაც უფრო დიდია ეს მაჩვენებელი, აპარატი მით უფრო მარტივად და სწრაფად გაუმკლავდება თავის დავალებას. პატარა სიმძლავრის ბლენდერს კი, მაინცდამაინც, გაყინული პროდუქტის დამუშავებას ნუ მოსთხოვთ.


შეიძლება თუ არა ყავის მარცვლების დაფქვა?

 ექსპლუატაციის ინსტრუქციაში ბლენდერების ბევრ მოდელს პირდაპირ აქვს მითითებული, რომ ყავის მარცვლების დაფქვა არ შეიძლება. მაგრამ თუკი ასეთი აუცილებლობა დაგიდგებათ, სტაციონარულ მოდელში, რომელსაც დიდი სიმძლავრე აქვს, ყავის მარცვლების დაფქვა შეგიძლიათ. შედეგი, რა თქმა უნდა, ისეთი ვერ იქნება, როგორსაც ყავის საფქვავით მიიღებდით. ეს აიხსნება აპარატურის კონსტრუქციის სპეციფიკით: ბლენდერის დანები სიმაღლეზეა განლაგებული, ძირს არ ეხება და პატარა მარცვლები დანების ქვეშ ექცევა, შესაბამისად კი სტაციონარულ მოდელს მარცვლების წმინდად დამუშავება გაუჭირდება. ამიტომ, თუკი ყავის მარცვლების დაფქვა რეგულარულად გიწვეთ, უმჯობესია კონკრეტულად, ამ პროცესისთვის განკუთვნილი საფქვავი შეიძინოთ.


ბლენდერის თავები 
- რა მოჰყვება კომპლექტში?

ხელის ბლენდერებს კომპლექტში მოჰყვება ბლენდერის ფეხი, რომელიც შეიძლება იყოს როგორც მეტალის, ასევე პლასტმასის. თუკი თქვენ უფრო ხშირად ცხელი პროდუქტის დაბლენდერება მოგიწევთ, უმჯობესია პლასტმასის ფეხი შეარჩიოთ, მაგრამ რკინის ფეხი, გაცილებით, გამძლეა; ასევე, ბევრ მოდელს კომპლექტში მოჰყვება თავები შემდეგი ფუნქციებით: სათქვეფი თხელი კრემებისა და მუსებისთვის, თავი პროდუქტის საჭრელად, თავი კარტოფილის პიურეს მოსამზადებლად (თუკი კარტოფილის პიურეს მოსამზადებლად ბლენდერის ჩვეულებრივ პირს გამოიყენებთ, გაურკვეველ წებოვან სუბსტანციას მიიღებთ). ზოგიერთი მოწყობილობა ჭიქით არის წარმოდგენილი, თუმცა მოდელების უმეტესობას მის გარეშე იყიდება. ასეთ შემთხვევაში თავისუფლად შეგიძლიათ, როგორც ზემოთაც აღვნიშნეთ, პროდუქტი ქვაბში ან ცოტა ღრმა ჯამში დააბლენდეროთ;

სტაციონარულ მოდელებს (ისევე როგორც მინი ბლენდერებს) დანების ერთი კომპლექტი ახლავს, რომელიც, უმეტეს შემთხვევაში, არ იხსნება, თუმცა, აბსოლუტურად, საკმარისია მრავალფეროვანი ფუნქციების შესასრულებლად.

უნდა აღინიშნოს, სამივე სახეობის ბლენდერს უჟანგავი ფოლადის დანა აქვს.
სტაციონარული მულტიფუნქციური ბლენდერი


უსაფრთხოა თუ არა ბლენდერის პლასტმასის ჭიქა და რას ნიშნავს მარკირება BPA Free?

BPA, რომელსაც შემოკლებულად ბისფენოლი A შეარქვეს, სინთეზური ესტროგენია, რომელსაც ზოგიერთი სახეობის პლასტმასა შეიცავს. კვლევების თანახმად, ბისფენოლი A ტოქსიკური ნივთიერებაა და შეიძლება, დამღუპველად იმოქმედოს ადამიანის ორგანიზმზე. ამიტომ ბევრმა თანამედროვე მწარმოებელმა უარი თქვა ამ ნივთიერების გამოყენებაზე და ის უახლესი მაღალტექნოლოგიური მასალით ტრიტანით ჩაანაცვლა.

ასე რომ, ბლენდერი, რომლის პლასტმასის ჭიქასაც აქვს მარკირება BPA Free, თქვენი და თქვენი პატარების ჯანმრთელობისთვის აბსოლუტურად უსაფრთხოა.


როგორ უნდა გავრეცხოთ ბლენდერი და ბლენდერის თავები?

არასწორი მოვლის შედეგად შეიძლება, დანები დაჩლუნგდეს და თავისი საქმე ხარისხიანად ვეღარ შეასრულოს. ამიტომ რეკომენდებულია, აპარატის სამუშაო პირი ან ჭიქა ყოველი გამოყენების შემდეგ გარეცხოთ.

  • ხელის მოდელის გარეცხვა – ხელის ბლენდერი ნაწილებად დაშალეთ და ცალ-ცალკე გაავლეთ თბილ წყალში, შემდეგ გაამშრალეთ და შეინახეთ. არავითარ შემთხვევაში არ დაასველოთ სახელური და დენის შნური.
  • სტაციონარული და მინი ბლენდერების გარეცხვა – ბლენდერის ჭიქაში უნდა ჩაასხათ თბილი წყალი, რამდენიმე წვეთი ჭურჭლის სარეცხი სითხე და ამუშაოთ აგრეგატი 1-2 წუთს. ამის შემდეგ ჭიქა გამდინარე წყალში უნდა გაავლოთ. გაფრთხილება: მოწყობილობისიმ ნაწილის გარეცხვა, სადაც ძრავაა მოთავსებული, კატეგორიულად აკრძალულია.


შეიძლება თუ არა ბლენდერის გარეცხვა ჭურჭლის სარეცხ მანქანაში?

ზოგიერთი მოდელისთვის ნებადართულია დანების და ჭიქის გარეცხვა ჭურჭლის სარეცხ მანქანაში. ამის შესახებ უმჯობესია, ბლენდერის ინსტრუქციაში მოცემულ ინფორმაციას გაეცნოთ. გარე ნაწილები კი, მხოლოდ, დასველებული, რბილი ნაჭრით უნდა გაწმინდოთ.

სხვა სიახლეები