მედია

14 დეკემბერი 2021

როგორ შევარჩიოთ გამწოვი

დღეს თანამედროვე სამზარეულო წარმოუდგენელია საყოფაცხოვრებო ტექნიკის გარეშე. მათ შორის, აუცილებლად, არის სამზარეულოს გამწოვი. მისი დანიშნულება, არა მხოლოდ, სუნისა და ორთქლის „გაქრობაა“, არამედ სამზარეულოდან ნამწვიც გააქვს და ამით თქვენს ჯანმრთელობას იცავს.

იმისთვის, რომ ამ მოწყობილობამ თქვენს სამზარეულოში ეფექტურად იმუშაოს, ძლიერი მოდელი უნდა შეარჩიოთ. საამისოდ კი სწორად უნდა შეარჩიოთ გამწოვის ზომები, კონსტრუქცია და დიზაინი, ფილტრის სახეობა, შეწოვის სიმძლავრე, ხმაურის დონე, განათება და მართვის სტილი.

მოდით, მოკლედ განვიხილოთ ამ მახასიათებლებიდან თითოეული.

როგორ შევარჩიოთ სამზარეულოს გამწოვის ზომა?

სამზარეულოს გამწოვისთვის სტანდარტული სიგანეა: 50 სმ, 60, სმ, 90 სმ და 120 სმ. სიგანეს ირჩევთ გაზქურის მიხედვით. იმისთვის, რომ მოწყობილობამ მთელი სიძლიერით იმუშაოს და გაზის ქურიდან წამოსული სუნი და ორთქლი „არსად გაუშვას“, ის, აუცილებლად, ქურის ზედაპირზე განიერი უნდა ამოარჩიოთ.

გარდა ამისა, აუცილებელია, გამწოვის მონტაჟის დროს სწორი სიმაღლე იყოს შერჩეული. დამონტაჟდეს ქურის ზედაპირიდან 70-85 სმ–ზე, თანაც იმ პირობებში, როდესაც ქურის ზედაპირსა და იატაკს შორის მანძილი 90 სმ-ია.

ძლიერი გამწოვი

კონსტრუქცია და დიზაინი

არსებობს ავტონომიური და ჩასაშენებელი გამწოვები. მონტაჟის პრინციპის მიხედვით, ესენია:

  • კედლის, იგივე–გუმბათოვანი გამწოვი, რომელიც კედელზე მაგრდება და არის როგორც კუთხის, ისე დახრილი ფორმის;
  • ჭერის, იგივე - კუნძული გამწოვი, რომელიც ჭერზე მონტაჟდება და შეგიძლიათ, როგორც სამზარეულოს კუნძულის თავზე, ასევე სამზარეულოს ნებისმიერ ნაწილში ჩამოკიდოთ;
  • ტელესკოპური გამწოვი, რომელიც ჩასაშენებელი გამწოვია და გაცილებით ბიუჯეტურ მოდელს წარმოადგენს. ის სამზარეულოს ქურის თავზე დაკიდებული კარადის ძირში მონტაჟდება;
რაც შეეხება სამზარეულოს გამწოვების დიზაინს, ამ მხრივ დღეს დიდი არჩევანი გაქვთ, როგორც ფორმების - ბრტყელი, T-ფორმის, მომრგვალებულ, ტრაპეცია, დეკორატიული, ასევე ფერების მხრივ - კლასიკური თეთრი, უჟანგავი ფოლადის ფერი, შავი, შინდისფერი, სალათისფერი...

ეს საყოფაცხოვრებო ტექნიკა შეიძლება, დამზადებული იყოს ალუმინისგან, უჟანგავი ლითონისგან და მინისგან.
გამწოვის მონტაჟი

მუშაობის რეჟიმები

სამზარეულოს გამწოვები მუშაობის რეჟიმის მიხედვით ორ ჯგუფად იყოფა: ერთი ითვალისწინებს სამზარეულოდან ნამწვი და ორთქლი გატანას შენობის გარეთ, ხოლო მეორე რეჟიმი ცირკულაციის პრინციპია, რაც იმას გულისხმობს, რომ სამზარეულოდან გატანილი ჰაერი გამწოვში იფილტრება და უკან გაწმენდილი ბრუნდება. მართალია, ასეთი მოდელებს ჰაერსადენი არ სჭირდება, მაგრამ ისინი ხმაურიანია და უკვე მოძველებულ მოდელებად მიიჩნევა.

ყურადღება: გამწოვის მონტაჟი, აუცილებლად, სპეციალისტმა უნდა შეასრულოს. სამზარეულოში, რომელშიც გაზის ქურა და გაზის სხვა მოწყობილობები მუშაობს, არ შეიძლება საერთო სავენტილაციო არხთან გამწოვის მიერთება, რადგან გაჟონვის შემთხვევაში გაზი სავენტილაციო არხში დაგროვდება. ეს კი, თავადაც ხვდებით, თუ რა დიდი საფრთხის შემცველია. მოწყობილობის ჰაერსადენი (საჰაერო მილი) გარეთ უნდა გადიოდეს.

ფილტრები

სამზარეულოს გამწოვებში 2 სახის ფილტრი გამოიყენება:

ცხიმის ფილტრი - კარგად უმკლავდება ცხიმის უმცირეს ნაწილაკებს. ცხიმის ფილტრები არსებობს:

  • ერთჯერადი ცხიმის ფილტრი - ქაღალდის, სინთეტიკური მასალის, რომლებიც, ძირითადად, პატარა გამწოვისთვის გამოიყენება;
  • მრავალჯერადი ცხიმის ფილტრი - აკრილის (რომელსაც დელიკატური წმენდა სჭირდება), ალუმინის ან უჟანგავი ლითონის, რომლებიც მარტივად იწმინდება და ჭურჭლის სარეცხ მანქანაშიც კი ირეცხება.  მეტალისგან მზადდება და მრავალჯერადია. ის მარტივად იხსნება და ირეცხება;

ნახშირის ფილტრი - გამწოვი ნახშირის ფილტრით სამზარეულოდან ეფექტურად აქრობს საჭმლის სუნს. ნახშირის ფილტრის საფუძველია გააქტივებული ნახშირი, რომელიც შეისრუტავს და აჩერებს მავნე ნივთიერებებს. ამ ფილტრის კორპუსი პლასტმასისგან მზადდება და შეიძლება იყოს სხვადასხვა ფორმის: მართკუთხედი, მრგვალი და ა.შ.; ნახშირის ფილტრი ერთჯერადია, ამიტომ დროულად სჭირდება შეცვლა, რათა თავისი საქმე ეფექტიანად შეასრულოს.
ჩასაშენებელი გამწოვი

გამწოვის ძრავა და შეწოვის სიმძლავრე

თუ გსურთ, რომ მოწყობილობამ გამართულად იმუშაოს, სიმძლავრეზე ეკონომია არ უნდა გააკეთოთ.

ძლიერი გამწოვი ყოველთვის კარგი გადაწყვეტილებაა, იმდენად, რამდენადაც ის უზრუნველყოფს თქვენი სამზარეულოსთვის ჰაერის მაქსიმალურ ცირკულაციას ანუ შეწოვის სიმძლავრე (წარმადობა) აქვს მაღალი. ამიტომ ყურადღება ამ მონაცემზე განსაკუთრებით გაამახვილეთ..

დღედღეობით, იყიდება გამწოვები, რომელთა შეწოვის სიმძლავრეა 70-დან 1500-მდე 3მ/სთ;

როგორი გჭირდებათ თქვენ?

ამის გამოსათვლელად სამზარეულოს ფართობი უნდა გაამრავლოთ 10-ზე. მაგალითად, თუ თქვენი სამზარეულოს სიგრძეა 4 მ x სიგანე 3 მ x სიმაღლე 2.5 = 303მ; ამ ფართობს ვამრავლებთ 10-ზე: 10x303მ = 300 3მ/სთ. ანუ თქვენი სამზარეულოსთვის გამწოვის შეწოვს ოპტიმალური სიმძლავრე უნდა იყოს 300 მ 3/სთ.

დღეს მწარმოებლებს ეს მახასიათებელი, როგორც წესი, მითითებული აქვთ აპარატურის საექსპლუატაციო მონაცემებში.


გამწოვის ხმაურის დონე

რა თქმა უნდა, არავინ სურს, რომ გამწოვი ხმაურით მუშაობდეს. სპეციალისტები მიიჩნევენ, რომ 30-დან 70-მდე დეციბელი (მუშაობის რეჟიმის მიხედვით) მისაღები მაჩვენებელია.

სამზარეულოს გამწოვი

გამწოვის განათება

ქურის თავზე დამონტაჟებული გამწოვი კარგი საშუალებაა დამატებითი განათებისთვის. ამიტომ სამზარეულოს მოდელის შერჩევისას ყურადღება მიაქციეთ ამ ფუნქციასაც. თანამედროვე მოწყობილობას შეიძლება ჰქონდეს LED ნათურა, ჰალოგენური ან ჩვეულებრივი, ვარვარა ნათურა.

 
მართვის ტიპი

ყველაზე სანდო, მარტივი და, შესაბამისად, იაფი გამწოვი ის არის, რომლის კონტროლის ტიპი მექანიკურია. ასეთ მოდელებში ჩართვა და რეჟიმის არჩევა ღილაკებით ხდება. თუმცა დღეს ასევე გავრცელებულია გამწოვები სენსორით. ზოგიერთი ძვირად ღირებული მოდელს თხევად-კრისტალური დისპლეი აქვს. მასზე აისახება ინფორმაცია წარმადობის, მუშაობის რეჟიმის და განათების შესახებ. ასევე, შეიძლება ჰქონდეს დისტანციური მართვა ავტომატური ჩართვის სენსორებით, რომელიც ტენიანობის მატებისას ავტომატურად იწყებს ფუნქციონირებას.

 

დასკვნის სახით:

გამწოვი სამზარეულოში აუცილებელია! მთავარია, სწორედ ისეთი მოდელი შეარჩიოთ, რომელიც, თავისი მონაცემებით, თქვენს სამზარეულოს შეესაბამება. ამასთანავე,  ყოველთვის დაიცავით გამწოვის მოვლის წესები - პერიოდულად გარეცხეთ ალუმინის ფილტრი და გამოცვალეთ ნახშირის ფილტრი.

სხვა სიახლეები