News

27 January 2022

რომელი მაცივარი ჯობია? - მთავარი პარამეტრები და დამატებითი ფუნქციები

დღეს საოჯახო ტექნიკის შეძენას ხშირად სწორედ მაცივრით ვიწყებთ, რადგან მაცივარი, შეიძლება ითქვას, №1 საყოფაცხოვრებო ტექნიკაა. მის შესახებ ბევრი ინფორმაცია გვაქვს და პრაქტიკულად ყველამ ვიცით, თუ რა დანიშნულება აქვს მაცივარს და როგორი მაცივრები არსებობს.

თუმცა როცა საქმე ყიდვაზე მიდგება, ბაზარზე მაცივრების ბრენდების მრავალფეროვნებამ შეიძლება დაგვაბნიოს: აუცილებლად მრავალი ფუნქციით აღჭურვილი, ძვირად ღირებული მოდელი უნდა ვიყიდოთ, თუ თავის დავალებას იაფი მაცივრებიც უპრეტენზიოდ შეასრულებს?

სწორი გადაწყვეტილების მისაღებად ანუ ჩვენი საჭიროებების შესაფერისი ტექნიკის შესარჩევად უნდა ვიცოდეთ, რა მახასიათებლებს მივაქციოთ ყურადღება.


მაცივრის ზომები

მაცივრის სიგანე, სიღრმე და სიმაღლე უპირველესი და ყველაზე თვალსაჩინო პარამეტრებია. როგორც წესი, მაცივარი სამზარეულოში უნდა დაიდგას, სადაც ფართობი, უმეტესად, 6-დან 12 კვ. მეტრამდეა. ამიტომაც შერჩევას სწორედ გაბარიტებით ვიწყებთ:

სიგანე და სიღრმე - ქართულ ბაზარზე არსებული მაცივრების სტანდარტული სიგანეა 60 სმ და სიღრმე, დაახლოებით, 55-60 სმ. ასეთი გაბარიტებისაა არა მხოლოდ ცალკე მდგომი, არამედ, ასევე, სტანდარტული ჩასაშენებელი მაცივრები.

ზოგადად, 60 სმ სიგანე სტანდარტია მსხვილი საყოფაცხოვრებო ტექნიკისთვის, როგორებიც არის სარეცხი მანქანა, ჭურჭლის სარეცხი მანქანა, გაზქურა, ელექტროღუმელი ან გაზის ღუმელი...

სიმაღლე - ეს პარამეტრი, პრინციპში, ელემენტარული კომფორტის გათვალისწინებით უნდა შეარჩიოთ.

მოცულობა - ეს პარამეტრი უშუალოდ მაცივრის გაბარიტებიდან გამომდინარეობს და ლიტრებში იზომება.

სასარგებლო მოცულობის გამოთვლა მარტივად შეგიძლიათ - უნდა დაითვალოთ, რამდენი ადამიანი ისარგებლებს მაცივრით და რამდენი პროდუქტის შენახვა დაგჭირდებათ. ამასთან, უნდა გაითვალისწინოთ, რომ რეკომენდებულია, მაცივარში პროდუქტები თავისუფლად ეწყოს.  

  • 200 ლ. - ასეთი მოცულობის მაცივარი საკმარისია 1-2 ადამიანისთვის;
  • 250-300 ლ. - 3-სულიანი ოჯახისთვის;
  • 300-350 ლ. - 4-5-სულიანი ოჯახისთვის.
  • 500 ლ და მეტი - ასეთი მოცულობა კი დიდი ოჯახის მოთხოვნილებებზეა გათვლილი.

სასარგებლო მოცულობაში იგულისხმება საერთო მოცულობა - ანუ მაცივრის მოცულობა და საყინულე კამერის მოცულობა ერთად. მათი როგორი თანაფარდობა უნდა ჩაითვალოს ოპტიმალურად, ეს თქვენს ინდივიდუალურ საჭიროებებზეა დამოკიდებული. ზოგადად კი მიიჩნევა, რომ მაცივრის კამერა 2-3-ჯერ დიდი უნდა იყოს საყინულე კამერაზე.

მაცივრის კამერების რაოდენობა

დღევანდელი მომხმარებელი იმდენად მიეჩვია მაცივრის ორკამერიან კონსტრუქციას, რომ ხშირ შემთხვევაში ერთკამერიანი მაცივარი ყურადღების მიღმა რჩება, თუმცა ასეთ მოდელებსაც აქვს თავის უპირატესობები.

ერთკამერიან მაცივარს ერთი კარი აქვს, რომლითაც ორივე განყოფილება - სამაცივრეც და საყინულეც ერთად იღება. ერთკამერიანი მაცივრის კონსტრუქცია მარტივია, მცირე ენერგიას მოიხმარს და ასევე მცირე გაბარიტები აქვს. ამიტომ: პატარა ადგილს დაიკავებს სამზარეულოში; გამოგადგებათ როგორც ბარი-მაცივარი; გამოიყენებთ კაბინეტში ან ოფისში; პატარა მაცივარი შეგიძლიათ, ადვილად წაიღოთ აგარაკზე, რადგან ავტომობილში ეტევა; ამიტომ ხშირად მინი მაცივრები ოპტიმალური არჩევანია.

ორკამერიანი მაცივარი კი აღჭურვილია ორი კარით თითოეული კამერისთვის, დიდი გაბარიტები აქვს; მისი საყინულე კამერა გაცილებით სრულფასოვანი და ტევადია, რაც საშუალებას იძლევა, ხანგრძლივად შევინახოთ პროდუქტი - 6 თვემდეც კი.

გალღობის ტიპი

ალბათ, გეცოდინებათ, რომ არსებობს გალღობის სამი სახეობა:

  • წვეთოვანი სისტემა
  • მშრალი / No Frost
  • კომბინირებული /  Frost Free

მაცივარი წვეთოვანი სისტემით / De Frost

ასეთ მაცივრები კონდენსაციის პრინციპზე მუშაობს. როგორც წესი, მაცივრის კამერაში, უკანა კედელზე და საყინულე კამერაში ყინვის წვეთები ჩნდება. როცა მაცივარის ძრავი ჩერდება, წვეთები ლღობას იწყებს და სპეციალური დრენაჟით ჩაედინება ქვედა სადგამზე. ასეთი პროცედურა მუდმივად მეორდება. თუმცა საყინულე კამერაში ყინული ვერ ასწრებს ლღობას და დროთა განმავლობაში  ახალ-ახალი ფენები ემატება. ეს, გარკვეულ დისკომფორტს ქმნის - მოგიწევთ, წვეთოვანი სისტემის მაცივარი 3-4 თვეში ერთხელ მაინც მექანიკურად გაასუფთაოთ ყინულის ფენისგან - ანუ მაცივარი უნდა გამორთოთ, საყინულეში დაგროვებული ყინული გაადნოთ, საყინულე კამერა გაწმინდოთ და შემდეგ ჩართოთ.

იგივე პრინციპით მუშაობს მაცივრები Twin Cooling, Direct Cool.

წვეთოვანი სისტემის უპირატესობად კი იმას მიიჩნევენ, რომ პროდუქტი ოპტიმალურ ტენიანობას ინარჩუნებს და არ გამოშრება.

მაცივარი მშრალი ყინვით  / No Frost

დღეს ყველაზე პოპულარულია მაცივარი მშრალი ყინვით. ასეთი სახელი იმის გამო შეერქვა, რომ  მაცივრის და საყინულის კამერებში მუდმივად სიმშრალეა - იქ ვერც ყინულის წვეთებს ნახავთ და, მით უმეტეს, ვერც ყინულის ფენას.

იგივე პრინციპით მუშაობს მაცივრები Full No Frost, Total No Frost, Full No Frost.

მშრალი ყინვის მაცივარში გაყინვა-გალღობის პროცესი სრულად ავტომატურ რეჟიმში ხდება. ანუ თქვენს საქმეს ავტომატიკა აკეთებს და ეს ძალიან მოსახერხებელია. თუმცა ამ კომფორტის გამო მოგიწევთ, მეტის გადაიხადოთ და სასარგებლო მოცულობა დათმოთ. საქმე ის არის, რომ მშრალი ყინვის მაცივრის ნაწილები, ისეთი როგორიც არის ამაორთქლებელი, ვენტილატორი, მილისებრი ელექტროგამათბობელი (ტენები), დამალულია მაცივრის კამერაში კედლის უკან, რაც ფართობს ამცირებს. შესაბამისად, მშრალი მაცივრის სასარგებლო მოცულობა უფრო მცირეა, ვიდრე იმავე გაბარიტების მქონე „წვეთოვანი მაცივრისა“.

კომბინირებული მაცივარი /  Frost Free

ასეთ მაცივრებში მაცივრის კამერა გალღობის წვეთოვანი სისტემით მუშაობს, ხოლო საყინულე კამერა - მშრალი სისტემით.

გამოდის, რომ ასეთ მოდელებში ორივე სისტემის უპირატესობებია გამოყენებული: სამაცივრე კამერაში პროდუქტი არ გამოშრება, ხოლო საყინულე ავტომატურად გალღვება.

თუმცა, ამ შემთხვევაში მედლის მეორე მხარეც უნდა ვიცოდეთ: Frost Free რთული სისტემაა დადაზიანების შემთხვევაში მაცივრის ნაწილები, მაცივრის ხელოსანი და რემონტი საკმაოდ ძვირი დაგიჯდებათ.


გალღობის რომელი სისტემა ჯობია?

  • წვეთოვანი სისტემა: მარტივია და, შესაბამისად, უფრო საიმედოდ მიიჩნევა. ფასიც ყველაზე დაბალი აქვს; თუმცა მასში ყინულს პერიოდულად გალღობა სჭირდება.
  • No-Frost (ან Full No Frost საყინულე+მაცივარი): ეს ოპტიმალური ვარიანტია კომფორტის და საიმედოობის მხრივ. თუ პროდუქტს კონტეინერებში ან ცელოფნით შეინახავთ, გამოშრობის საფრთხეც არ დგას. არც მისი რემონტის შემთხვევაში გექნებათ განსაკუთრებული პრობლემები. თუმცა მაცივარი მშრალი ყინვით უფრო ძვირია, ვიდრე წვეთოვანი სისტემის მაცივრები.
  • კომბინირებული: აქ ერთდროულად ორი სისტემა მუშაობს, ამიტომ ასეთი მაცივრები უფრო მეტად დგას დაზიანების რისკის ქვეშ, რემონტი კი ძვირია. კომბინირებულ მაცივრებს, რომელიც ახალი ტექნოლოგიაა, ფასიც უფრო მაღალი აქვს.
მაცივრის ხმაურის დონე

 

მაცივრის ხმაურის დონე დეციბელებში იზომება.

მიღებული სტანდარტის თანახმად, მაცივრის ხმაურის დონე უნდა იყოს 25-დან 50 დეციბელამდე. 

  • მაცივრის ხმაურის დაბალი დონეა - 25-34 დბ;
  • საშუალო დონე - 35-44 დბ;
  • მაღალი დონე - 44 დბ და მეტი;

შესადარებლად: ადამიანის ჩურჩული - 20 დეციბელია, საუბარი - 60 დეციბელი.

კლიმატის კლასი

მაცივრის კლიმატის კლასს ხშირად არ ვაკვირდებით, არადა საკმაოდ საყურადღებო პარამეტრია.

კლიმატის კლასი აჩვენებს გარემოს ტემპერატურისა და ტენიანობის იმ დიაპაზონს, რომელიც ოპტიმალურია ამა თუ იმ მოდელის ექსპლუატაციისთვის.

ბოლო დროს კი საქართველოში ზაფხულის თვეები საკმაოდ ცხელია და იმ ოთახში, სადაც მაცივარი დგას, ტემპერატურამ შეიძლება +35°С-საც კი გადააჭარბოს. როცა ძრავის სიმხურვალეს ემატება ოთახის მაღალი ტემპეტატურა, ამან შეიძლება, მაცივარი მწყობრიდან გამოიყვანოს. ამიტომ, ყურადღება მიაქციეთ ამ პარამეტრსაც.

მაცივრებში არსებობს 4 კლიმატური კლასი:

  1. N (normal)- ასეთი მარკირების მქონე მოდელი ნორმალურად იმუშავებს იმ ოთახში. სადაც ტემპერატურაა +16-დან +32°С-მდე. კლიმატური კლასი N ყველაზე პოპულარულია და გამოდგება ბინებში, ოფისებში, სავაჭრო წერტილებში;  
  2. SN (subnormal) - ამ კლასის ტემპერატურული დიაპაზონია +10-დან +32°С-მდე. ასეთი მაცივრის ექსპლუატაცია დასაშვებია იმ ადგილებში, რომლებიც ზამთარში ნაკლებად თბება - სარდაფში, მარანში, ვერანდაზე. ასეთ მოდელებს ენერგომოხმარების მაღალი ხარჯი აქვს;
  3. ST (subtropical) - ამ კლასის სამუშაო ტემპერატურის დიაპაზონია +18-დან +38°С-მდე. ასეთი მაცივრების ექსპლუატაცია დასაშვებია ისეთ შენობებში, სადაც მაღალი ტენიანობაა - რესტორნების სამზარეულოები, საწარმოები და სხვ. ასევე, კარგი არჩევანია ცხელი რეგიონებისთვის.
  4. Т (tropical) - ამ მარკირების მქონე მოდელები მუშაობს +18 °С-დან +43 °С-მდე ტემპერატურაზე. ისინი გათვლილია მშრალი, ტროპიკული კლიმატისთვის ან ისეთი ოთახისთვის, სადაც მზის სხივები პირდაპირ ხვდება მაცივარს.   

ბოლო პერიოდში ბაზარზე გამოჩნდა მოდელები, სამუშაო ტემპერატურის უფრო ვრცელი დიაპაზონებით, რომლებიც ერთდროულად მოიცავს ორ, სამ და, ზოგჯერ, ოთხივე კლიმატურ კლასსაც კი:

  • N-ST - სამუშაო ტემპერატურის დიაპაზონით + 16-დან  +38°С-მდე;
  • N-T - სამუშაო ტემპერატურის დიაპაზონით + 16-დან  +43°С-მდე;
  • SN-ST - სამუშაო ტემპერატურის დიაპაზონით + 10-დან +38°С-მდე;
  • SN-T - დასაშვები ტემპერატურა ოთახში + 10-დან +43°С-მდე.

თუმცა უნდა გაითვალისწინოთ, რომ ასეთი მოდელები მეტ ელექტროენერგიას ხარჯავს და გაცილებით ძვირია.

მაცივრის კომპრესორი


კომპრესორის გარეშე მაცივარი ვერ იფუნქციონირებს.  კომპრესორი ეწოდება მოწყობილობას, რომელსაც შეუძლია უზრუნველყოს რომელიმე ნივთიერების შეკუმშვა (მაცივარში ეს არის ფრეონი), ასევე მის მოძრაობა გაგრილების სისტემაში. სწორედ კომპრესორს გამოაქვს ცხელი ჰაერი მაცივრის კამერიდან და ქმნის მასში პროდუქტების შესანახად საჭირო ტემპერატურას.

გარდა ამისა, კომპრესორის მუშაობაზეა დამოკიდებულია:

  • მოხმარებული ელენერგიის რაოდენობა
  • მუშაობის ეფექტურობა
  • ძაბვის ცვალებადობის მიმართ გამძლეობა
  • ტექნიკის ექსპლუატაციის ხანგრძლივობა 

კომპრესორები არსებობს კლასიკური და ინვერტორული.

კლასიკური კომპრესორის მუშაობის პრინციპი, მარტივად რომ ვთქვათ, ასეთია: ჩაირთვება, გააციებს მაცივარში ჰაერს მოცემულ ტემპერატურამდე და გამოირთვება. სწორედ ჩართვა-გამორთვისას გამოსცემს მაცივარი იმ ხმას, რომელიც ჩვენთვის კარგად ნაცნობია. ამასთან, ჩართვის დროს ბევრი ელქტროენერგია იხარჯება და კომპრესორზეც დიდი დატვირთვა მოდის, რაც მის საექსპლუატაციო ვადას ამცირებს.

ინვერტორული ტექნოლოგია კი სწორედ აპარატის ექსპლუატაციის ვადის გასახანგრძლივებლად და ენერგომოხმარების შესამცირებლად შეიქმნა. ინვერტორული მაცივრის კომპრესორი მუდმივად მუშაობს და მუშაობის სიმძლავრეს თავად არეგულირებს - ზრდის ან ამცირებს - კამერებში ტემპერატურის მიხედვით. ინვერტორული მაცივარი უხმაუროდ მუშაობს, მისი საექსპლუატაციო ვადა დიდია და ნაკლებ ელექტროენერგიას ხარჯავს. ეს, რა თქმა უნდა, ფასზე აისახება, მაგრამ დარწმუნებული იყავით, რომ ინვერტორული მაცივარი დიდხანს და ეფექტიანად მოგემსახურებათ.

მაცივრის ენერგოეფექტურობა

მაცივარი მუშაობს 24/7, ამიტომ ისეთი აპარატი უნდა შეარჩიოთ, რომელსაც ელექტროენერგიის ხარჯი ნაკლები აქვს და ბინაში ქსელს არ გადატვირთავს.

საყოფაცხოვრებო ტექნიკის ენერგოეფექტურობა აღინიშნება ლათინური ასოებით: А, B, C, D, E, F, G.

ყველაზე ნაკლებ ელექტროენერგიას А კლასის აპარატები მოიხმარს, ხოლო რაც უფრო ახლოს არის G კლასთან, ხარჯი გაცილებით მეტი აქვთ, მაგრამ ამასთანავე მეტად ფუნქციონალურია, განსაკუთრებით - სამეწარმეო საქმიანობისთვის.

მაცივრის დამატებითი ფუნქციები

რაც უფრო მეტი ოპცია აქვს მაცივარს, უფრო მაღალია მაცივრის ფასიც. სამაგიეროდ ასეთი აპარატი იმდენად ჭკვიანია, რომ ის რეალურად დაგეხმარებათ სამზარეულოში და მაქსიმალურად გაგიმარტივებთ საქმეს.

ჭკვიანი მაცივრის რამდენიმე ფუნქციას ჩამოგითვლით:

Fresh Zone - ეს ძალიან სასარგებლო ოპციაა. ასეთ მაცივარს რამდენიმე კლიმატური ზონა აქვს, სხვადასხვა ტენიანობით და ტემპერატურით. ფრეშ ზონაში ტემპერატურაა, დაახლოებით, 0°С, რაც გვეხმარება ზოგიერთ პროდუქტი მაქსიმალურად დიდხანს და ჯანსაღად შევინახოთ. ზოგიერთ მოდელს ორი ფრეშ ზონაც აქვს, სხვადასხვა პროდუქტისთვის: DrySafe – დაბალი ტენიანობით (50-55%), თევზისა და ზღვის პროდუქტებისთვის და HydroSafe – მაღალი ტენიანობით (85-90%), ბოსტნეულისა და ხილისთვის;

Antibacterial - მაცივრის შიდაკედლების ანტიბაქტერიული დაფარვა ხელს უშლის ბაქტერიების გამრავლებას და უსიამოვნო სუნის გაჩენას.  თუმცა თუკი მაცივრის და საყინულის კამერებს დროულად გაასუფთავებთ ხოლმე - მაგალითად, სოდიან წყალში დასველებული და გაწურული ტილოთი, შეგიძლიათ, ამ ფუნქციის გამო ზედმეტი აღარ გადაიხადოთ.

Super freeze - ეს სუპერგაყინვის ფუნქციაა, რომელიც საშუალებას გაძლევთ, მინიმალურ დროში გაყინოთ პროდუქტი და ამ გზით შეუნარჩუნოთ სასარგებლო ვიტამინები, მინერალები და ნივთიერებები.

Child Lock - ბავშვებისგან დაცვის ფუნქციას განსაკუთრებით დააფასებენ პატარების მშობლები. ამ ფუნქციის ჩართვით თქვენ დაბლოკავთ ყველა ღილაკს, რაც კი მაცივარს აქვს, თუმცა კარის გაღებას ჩვეულებრივ შეძლებთ და ამ მხრივ დისკომფორტი არ შეგექმნებათ.

კარის გადატანის შესაძლებლობა თანამედროვე მაცივრებს ხშირ შემთხვევაში უნივერსალური კარი აქვს - ანუ შესაძლებელია, კარის გადატანა და გაღების მიმართულების შეცვლა, მხოლოდ პეტლების გადაადგილებით. თუმცა თუ ამ ოპციის გამო ძვირის გადახდა არ გსურთ, გირჩევთ, როდესაც სამზარეულოში მაცივრისთვის ადგილს შეარჩევთ, ყურადღება მიაქციეთ, საით იქნება კარის გაღება უფრო მოსახერხებელი.

რომელი მაცივარი ჯობია სახლისთვის?

ჩვენთვის იდეალური მაცივრის ფორმულა რომ გამოვიყვანოთ, უნდა გავფილტროთ ჩვენთვის ნაკლებად საჭირო ფუნქციები.

შედეგად, კორპუსის ბინაში მცხოვრები 3-4 სულიანი ოჯახისთვის საშუალო კლასის საიმედო, ფუნქციონალური მაცივარი ასეთი იქნება:

  • ორკამერიანი
  • მოცულობა - 240-300 ლ
  • სიმაღლე - 170-200 სმ
  • ძრავი - ინვენტორული
  • კლიმატური კლასი - N, SN ან ST
  • ელმხმარება - А ან А+ (რაც მეტია +, მით უკეთესი)
  • ფერი - თეთრი ან ვერცხლისფერი.

მას შემდეგ, რაც დარწმუნდებით, რომ მაცივრის სახით კოსმოსური ხომალდი არ გჭირდებათ და თქვენთვის საჭირო ფუნქციებს შეარჩევთ, უკვე შეგიძლიათ, მაცივრის ბრენდს და მის ვიზუალს მიაქციოთ ყურადღება.

გარწმუნებთ, მიდეას მაცივრები პრაქტიკული და საიმედო ტექნიკაა, რომელიც იდეალურად ჩაჯდება ნებისმიერი სამზარეულოს ინტერიერში!

Other News